LAOAG CITY – Nagpostibo iti drug test ti subject ti drug buy-bust operation iti Brgy.7-A Nuestra Seniora Natividad ditoy ciudad ti Laoag.
Daytoy ket ni Jay Mar Bumatay, alyas LAKI, agtawen ti 33, naasawaan, bus conductor, ken residente iti Brgy. Aring, Badoc, Ilocos Norte.
Immunan nga inrakurak ti Provincial Drug Enforcement Unit iti Ilocos Norte Police Provincial Office a ni Bumatay ket maibilang a Top 10 Regional High Value Individual iti Police Regional Office 1.
Malaksid iti inlako ni Bumatay iti police poseur buyer a maipagarop a maysa a sachet a naglaon ti maatap a shabu ket nakumpiskar pay dagiti otoridad ti walo a sachet ti maatap met laeng a shabu nga agdagsen amin dagitoy ti 4.8 a gramo ken agbalor ti 23,800 a pisos, maysa a 1,000.00 bill a nagserbi kas buy-bust money, walo nga open transparent plastic sachets, maysa a brown paper, maysa a colored black wallet ken maysa a cellphone ken ti personal a kwarta na a 1,920 a pisos.
Iti agdama, ni Bumatay ket nagtalinaed iti kustudiyar ti Philippine National Police ditoy ciudad ti Laoag ken sumango iti kaso a panaglabsing iti Republic Act 9165.
Naamoan a ni Bumatay ket drug surrenderee iti ili ti Badoc.
