LAOAG CITY – Kinumpirmaran ni Police Senior MSgt. Marcelino Corpuz Jr., ti team leader ti Provincial Drug Enforcement Unit (PDEU) iti Ilocos Norte Police Provincial Office (INPPO) a positibo ti resulta ti drug test ni Mr. Julimar Galang y Fontanilla, ti subject ti naiyuswat a drug buybust operation iti Brgy. 24 iti ili ti Sarrat.
Kuna na positibo pay a kukua na ti iligal a droga a nakumpiskar manipod iti daytoy.
Maipalagip a naiyuswat ti operasyon iti mismo a pagtaengan ni Galang ken nakumpiskar iti ikot na ti uppat a sachet a naglaon ti maipagarop a shabu ken ti sangaribo a pisos a nausar iti operasyon.
Malaksid iti maipagarup a shabu ket adda pay ti nakumpiskar dagiti otoridad a maysa a calibre 38 a paltog ken tallo a bala na, ken ti drug paraphernalia.
Basar pay kadagiti otoridad, manarimaan ti panagsususup ti suspek ti maipagarop a shabu kabayatan ti panangiyuswat da ti operasyon.
Naamoan a napan nagnaed ti suspek iti nasao a barangay manipod iti Brgy. Suyo ditoy siudad tapno imanihir na koma ti negosyo da kangrunaan na ti aglako ti pizza a mangrugi paylaeng iti umay a lawas.
Segun ken ni PMsgt. Corpuz Jr., team leader ti PDEU ditoy probinsya, immuna a natiliw ni Galang idi 2017 gapu met laeng iti illegal a droga ngem nakaruwar iti pagbaludan babaen iti plea bargaining.
Inbatad na a nabayagen a sipsiputan da ni Galang gapu iti illegal nga aktibidad na.
Ti suspek ket karaman iti Top 10 drug watchlist iti Region 1 ken daytoyen ti maikadwa a pannakatiliw na gapu iti illegal a droga.
