LAOAG CITY – Inbatad ni Police Major Carlo Abing, ti deputy chief of police ditoy ciudad ti Laoag a nabayag a minonmonitor da ti subject ti search operation a ni Macren Balbarez iti Barangay 1 ditoy ciudad.
Inlawlawag na a rimuar ti nagan ni Balbarez babaen kadagiti immuna a natiliw da gapu iti illegal a droga ditoy ciudad.
Inpakaammo ni Abing nga insayangkatan da pay ti drug buy-bust operation ti suspek ngem possible a nakadlaw ti maseknan rason a saan da a nagballaigi.
Nupay kasta, apaman a nakumpirmaran da a pudno nga adda ti illegal nga aktibidad ni Balbarez ket nagaplikar da ti search warrant tapno mapan da agsukisok iti balay ti suspek.
Innayon ni Abing a ti suspek ket saan laeng nga user no di ket supplier pay daytoy ti illegal a droga no sadinno nga iti Metro Manila ti paggap-gapwan ti iwarwaras na ditoy probinsya babaen ti GRS Express.
Gapu iti daytoy, kuna ni Abing a daytoy ti naiget nga im-imbestigaren da iti agdama tapno maamoan no siasinno ti indibidual a pagal-alaan na ti supply na iti Metro Manila.
Kuna na pay a nga iti agdama ket naiget ti panangmonmonitor da kadagiti indibidual a maipagarop a supsuplayan ni Balbarez.
Kabayatanna, inpaganetget ni Abing a no maipapan kadagiti alegasyon ti pamilya ti suspek a maipagarop nga adda dagiti pulis nga immuna a simrek iti kwarto ti suspek ket idasar to laengen dagiti maseknan iti korte.
Basar pay ken ni Abing, malaksid iti kaso a panagikot iti illegal a droga ket ad-adalen da no mabalin da pay a pilaan ti panaglabsing iti Election gun ban wenno ti Republic Act 10591 gapu iti naala a maysa a bala ti 20mm caliber iti kwarto ti suspek.
Immuna iti daytoy, kabayatan ti operasyon dagiti otoridad ket nakakumpiskar da iti kwarto ti suspek iti maysa a dakkel a supot a naglaon ti tangkay ti maipagarop a marijuana ken 10 a sachet ti maatap a napagango a bulong ti marijuana, maysa a bala ti MDC 1945 20mm mk-3 ken drug paraphernalia.
Mainaig iti daytoy, nagtalinaed ti takder ni Balbarez a naimula dagiti naala iti kwarto da nga ebidensya gapu ta ipetpetteng na nga awan ti illegal nga aktibidad na.
Kuna na pay a saan a makarkaruwar iti balay da gapu ta banbantayan na ti asawa na a dandanin agpasngay isut gapuna a saanna a maaramid ti ipabpabasol da kenkuana.
Inpalgak na pay nga awan ti ammo na a manggurgura kenkuana a mabalin a mangaramid kenkuana iti daytoy.
Uray ti kabsat ti suspek ket patien na a saan a maaramid ti kabsat na ti maipabpabasol kenkuana no sadinno a kweskwestyunaran na ti iseserrek dagiti agarop innem nga armado a lallaki iti kwarto ti kabsat na ken maipagarop nga inlock da pay ti ridaw iti uneg ti 10 agingga iti 15 a segundo.
Inpaganetget na nga ado dagiti mabalin a mapasamak iti uneg ti sumagmamano a segundo.
