LAOAG CITY – Inbatad ni Mrs. Francisca Pascual, taga Barangay 32-C, Lapaz ditoy ciudad ti Laoag a nabayagen nga agam-ammo da ken ni Larry Matulin, agtawen ti 38 ken residente iti Brgy. 12 ditoy siudad.
Maipalagip a natiliw ni Matulin kalpasan a nagtakaw ti maysa a kahon ti pasayan a naggapo iti Cayagan.
Segun ken ni Pascual, sigud nga agpaspasada iti rabii ni Matulin ken no adda ti sumangpet a lako na ket isuna ti mapan mangala ken mangikabil iti pwesto na.
Segun pay kenkuana, idi nangrugi ti covid-19 pandemic ket nagsardeng nga agpasada ni Matulin isut gapuna a timmulong kadagiti agasawa a taga Cagayan a naglako ti ikan.
Nupay kasta, gapu iti uma-ado nga utang ni Matulin ket pinagsardeng dagiti agasawa ken nagawid metten dagitoy idiay Cagayan.
Inbaga na a masdaaw no apay a nasurutan ni Matulin ti agtakaw, ngem possible a gapu daytoy iti kaawanen ti mailako na nga ikan.
Inpakaammo na pay a mabalin a dagiti inlaklako ni Matulin nga ikan idi awanen dagiti agasawa a taga Cagayan ket tinaktakaw na gapu ta nalaka unay ti panaglako na.
Naamoan na daytoy gapu ta iti paglaklakoan na ti ikan ket isu met ti paglaklakoan ni Matulin no sadinno a no mapanen aglako ket ibaga dagiti tattao a naladawen ken nalaklaka nga adayo ti panaggatang da iti suspek.
Mainaig iti daytoy, inbaga ni Pascual a napukawan met ti 35 a kilo a lako na a pasayan a ti puunan na ket P14, 950 a pisos.
Saanna a ninamnama a ni Pascual a ni Matulin ti akin-aramid ngem idi nabuya da ti CCTV footage ket nalasin na a dagus ti suspek isut gapuna a sumurot kadagiti kakadwa na a natakawan ti lako nga ikan para iti panangipursige da ti ipila da a reklamo.
