LAOAG CITY – Inadmitir ni Mrs. Julie Planta, agtawen ti 47, ken asawa ni Angelo Planta, ti maysa kadagiti natiliw nga agkaskasera iti Sector 6, Barangay 21 ditoy ciudad ti Laoag a nasungba-sungbatan na ni Barangay Chairman Jericho dela Rosa iti nadakamat a barangay.
Inistorya na nga idi napan ti kapitan ken pinagsasawan na ida ket nakigtot isut gapuna a nasungba-sungbatan na ni dela Rosa.
Daytoy ket iti baet a saanna pay nga ammo ti mapaspasamak iti dayta a gundaway.
Nupay kasta, idi naibagan ti kapitan a masapol nga iti uneg ti balay wenno kasera da ti rumbeng a pagtalinaedan da ket naawatan nan gapu ta ti ayan da ket iti uneg ti compound.
Gapu iti daytoy, nagturong da Mrs. Planta iti barangay hall tapno agpakawan ken ni Barangay chairman Dela Rosa iti panangsungba-sungbat na kenkuana.
Uray ni Mr. Planta ket nagpadespensar ken ni Barangay Chairman dela Rosa ken inadmitir na a nagbalin a natangken ti ulo da.
Malaksid kadagiti agasawa a Planta ket nagkiddaw met ti pammakawan iti kapitan dagiti dadduma pay nga agkaskasera, karaman ditoy da Ronald Andres, agtawen ti 20, Cedrick Planta, ken ni Florence Martinez.
Kagiddan iti daytoy, inkari da a saan danton nga uliten ti inaramid da.
Kabayatanna, saan nga inawat ni Barangay Chairman dela Rosa ti panagpadespensar dagiti maseknan ken nagtalinaed ti takder na a masapol a pumanaw dan iti barangay da.
