LAOAG CITY – Mapatta-patta nga umabot iti sumuruk-kumurang a 20 a milyon a pisos ti balor dagiti nadadael iti pannakauram ti siyam a pasdek negosyo iti Barangay 16 ditoy ciudad ti Laoag.
Daytoy ti inbatad ni Fire Senior Inspector Edison Reyes, City Fire Marshal ti Bureau of Fire Protection ditoy siudad ti Laoag.
Segun ken ni Reyes, naduktalan da nga iti maikadwa a kadsaaran ti establisimiento ket adda ti altar iti asideg ti salas na, nga isu ti patienda a nangrugyan ti apoy gapu ta isu laeng ti nakasaksak ti silawna.
Immunan nga inlawlawag ni Reyes a dakkelen ti apoy idi nagresponde da gapu ta saan a naireport a dagus kadakuada ti nasao a pasamak.
Kuna na pay a narigatan dagiti bumbero a makastrek kadagiti pasdek negosio gapu iti napuskol nga asok kadagiti nauram a light materials ken nagduduma a produkto iti uneg ti establishimento.
Ti uram ket nangrugi iti maysa a paglakoan kadagiti construction supplies agingga a nagramram ti dakkel nga apoy kadagiti kaabayna a pasdek negosio kas ti paglakoan ti motorcycle parts, ace marketing, barber shop, shoe shop, school supplies, eye clinic ken law office.
Mainaig iti daytoy, inrakurak ni Reyes a ti maysa pay a nagrigatan da iti panangsebseb da iti uram ket ti panagbunag da ti danom gapu iti trapiko isut gapuna a nagpatulong da kadagiti dadduma a Fire Station manipod iti nagduduma nga ili ken ciudad ditoy probinsya.
Karaman ditoy ti BFP-Ilocos Norte, BFP-San Nicolas, Bacarra, Vintar, Piddig, Burgos, Nueva Era, Currimao, Pasuquin, Sarrat, Solsona, Pinili ken iti ciudad ti Batac.
