LAOAG CITY – Nabigbigen dagiti suspek a nangitaray ti maysa a Toyota Vios ken inbati da lattan iti paset ti Barangay Sta. Maria ditoy ciudad ti Laoag.
Daytoy ket babaen kadagiti CCTV footages a nakaimuntar iti nakaiparkingan ti nasao a lugan.
Ti nasao a lugan ket innala dagiti suspek kabayatan a nakaparking iti IT Park iti ili ti San Nicolas itay kallabes.
Nupay kasta, nagkedked pay laeng ni Police Staff Sergeant Jhonley Apostol, chief investigator iti ili ti San Nicolas a nangipublikar ti pakabigbigan dagiti suspek.
Immunan a kinumpirman ni Police Major Joseph Baltazar, officer I charge ti PNP San Nicolas a kukua ni Sangguniang Bayan Member Maindryann Daine Sales, residente iti Brgy. Saud iti ili ti Pagudpud ti nasao a lugan.
Nakita iti uneg ti kotse ti eyeglass a nagmaris ti asul, sapatos, maysa a jacket, t-shirt, thermo flask, folder a naglaon ti dokumento, black a kaha ti paltog, nga addan 15 a bala ti paltog, 9mm pistol, short magazine para iti Kalibre 40 nga addaan pay ti 13 a bala ken mysa nga extended magazine gloc40.
