LAOAG CITY – Inpilan ti Philippine National Police iti ili ti Solsona ti kaso frustrated murder kontra iti suspek ti pammaltog a napasamak iti sango ti merkado publiko.
Nabigbig ti suspek a ni Ramil Padero Currameng, addaan ti umno a tawen ken residente iti Brgy. Sta Ana, Solsona ken daytoy ti mismo a gunman idinto a ti driver ti nagluganan na a motorsiklo ket saan pay a nabigbig.
Segun kenni Police Captain Randy Damo, ti Chief of Police iti ili ti Solsona, naipila ti kaso kas regular filing iti piskalya.
Inbatad na a nadeterminar na ti suspek babaen iti panangitudo dagiti testigo.
Kuna pay ni Damo a ti suspek ket dati a natiliw iti naiyuswat nga anti-illegal drug buy-bust operation idi 2021.
Maipalagip nga adda iti dayaen ti comfort room iti ruwar ti tiendaan ti biktima a ni Kerwin Passion y Agustin, agtawen ti 38, Municipal Quarry Inspector ken residente iti Brgy. Juan Solsona ket kellaat nga immasideg dagiti suspek ken pinalto-paltogan da daytoy a nakatamaan ti akin-kannigid a saka na.
Narekobre met dagiti otoridad iti nakapasamakan ti krimen ti pito a kapsula iti mapapati a kalibre 45 a paltog ken pito a slug.
