LAOAG CITY – Nabigbigen ti Philippine National Police ti nangserrek iti maysa a panganan iti paset ti Bacarra Road ditoy ciudad ti Laoag.
Daytoy ti kinumpirmaran ni Police Capt. Rudy James Jacalne, ti Deputy Chief of police ditoy ciudad ti Laoag.
Inbatad ni Jacalne a nabigbig ti suspek babaen ti Close Circuit Television (CCTV) camera, no sadinno nga adda ti nangbigbig iti daytoy ken adda pay ti testigo.
Segun ken ni Jacalne, saan da pay a mabalin nga ipublikar ti nagan ti suspek ngem kunana a daytoy ket residente metlaeng ditoy ciudad ti Laoag.
Inbatad na nga ipila da paylaeng ti kaso a theft kontra iti suspek ken no rumuar ti warrant of arrest ket isunto ti panangarestar da.
Inpakaammo ni Jacalne a ti suspek ket naarestar idi 2014 gapu iti panaglabsing iti Republic Act 9165 wenno Comprehensive Dangerous Drugs Act of 2002 ken Republic Act 10591 wenno Comprehensive Firearms and Ammunition Regulation Act.
Inpetteng ni Jacalne nga itultuloy da pay ti agimbestigar amangan no adda ti kakunsabo ti suspek nga empleado iti nasao a panganan.
Innayon na a masdaaw da gapu ta basar iti imbestigayon da ket ammo ti suspek ti ayan ti Close Circuit Television (CCTV) camera no sadinno nga apaman a nakastrek ket dineretso na ti ayan daytoy kalpasan na ket pinutedna.
Malaksid iti daytoy, arigna kabisado ti suspek ti ayan ti kwarta isut gapuna a ti patta-patta dagiti otoridad ket kabisado ti maseknan ti lugar wenno masansan a mapan mangan, wenno adda ti nangibaga kenkuana.
Mainaig iti daytoy, kuna ni Jacalne a bsar iti Close Circuit Television (CCTV) camera ket pasado alas dose ti parbangon a simrek ti suspek ngem naitawag laeng daytoy iti opisina da iti pasado alas-sais ti bigat babaen ti panangitawag da ti 911.
Maipalagip nga iti oras ti alas-6:45 ti bigat idi domingo, Agosto 3 ita a tawen ket nagreport iti kwerpo ti pulisya ni Mr. James Villanueva Gambeng, agtawen ti 29, awanan ti asawa, branch manager, ken residente iti Brgy. San Marcelino iti ili ti Dingras kalpasan a naduktalan na a ti naglakoan da nga umabot iti nasurok a 80 ribo a pisos a naikabil iti plastic bag ket mapukpukaw.
