LAOAG CITY – Kinumpirmaran ni Police Major Ryan Retotar, ti chief of police iti ili a Dingras a tengngel dan ti suspek a nangipatulod ti bomb threat iti Dingras National High School – Poblacion Campus itay kallabes.
Inbatad ni Retotar a ti suspek ket maysa nga estudyante nga agtawen ti 17 ken inadmitir na a mismo nga isuna ti nagtext iti mestrana.
Iti eksklusibo nga interview ti Bombo Radyo Laoag, inbatad ni Retotar a basar ti palawag ti suspek ket inpadas na laeng a tinulad ti nabuya na iti telebisyon.
Kuna pay ti nasao nga opisyal a nagtripan laeng ti estudyante a tineksan ti maysa a mestra na ken inbaga na nga adda ti naimula a bomba iti nasao a pagadalan.
Inpakaammo ni Retotar nga ulilan iti ina ti suspek idinto a ti ama na ket nakabalud.
Nupay kasta, inlawlawag na nga iti procedure ket pinaayaban da ti DSWD ken adalen da ti kaso ti suspek ken aniaman ti agbalin a resulta na ket isunto pay laeng ti panangipila da ti reklamo a panaglabsing ti Presidential Decree (PD) 1727 wenno Anti-Bomb Joke Law.
Innayon ni Retotar nga uray ti ikit ti suspek ket nakigtot iti inaramid ti kaanakan na.
