LAOAG CITY – Napilaanen ti kaso a murder ti suspek iti napasamak a pammagkong iti Brgy. Elizabeth iti ili ti Marcos.
Daytoy ti inpakaammo ni PCrpl. Arjen Walog, ti imbestigador iti PNP-Marcos.
Kuna na a nagtalinaed ti suspek iti kuerpo ti nailian a pulisya gapu ta awan ti nairekomendar a piyansa daytoy.
Maipalagip a nalamiisen a bangkay idi nabirokan dagiti otoridad ti biktikma a ni Rogelio Pascua.
Bayat ti pannakaiyuswat ti imbestigasyon ket adda ti nakita a dara iti kubo iti asideg ti fishpond.
Naamoan a naggi-inom ti biktima ken ti suspek idi rabii ti domingo ken maipagarup a dita nga adda ti nagbalin a riri dagitoy maipanggep iti fishpond.
Kabayatanna, bayat ti panagriri dagiti dua ket dita nga immasot ti buneng ti suspek ken inbagkong na iti mismo a barakong ti biktima ken isu met ti dagus a nakatayan daytoy ken kalpasan na ket intapwak ti suspek daytoy iti fishpond.
Naiyuswat ti hot pursuit operation ken babaen ti tulong dagiti residente ket nakemmeg ti suspek iti paset iti ili ti Sarrat.
Mainaig iti daytoy, inpetteng ti suspek nga awan ti panagbabawi na iti inaramid na gapu ta maipagarup a napunuanen iti saan a napintas nga araramiden kenkuana ti biktima.
