LAOAG CITY – Inbatad ti Philippine National Police a nagtennag nga homicide imbes a murder ti naipila a kaso kontra iti suspek ti panagtagtagbat iti Barangay 19, San Lorenzo iti ili ti San Nicolas.
Daytoy ket gapu ta naestablisar ti piskalya nga adda ti immuna a napasamak a komosyon sakbay iti panangtagbat ti suspek a ni Efren Dumrique y Guira, agtawen 55, iti kayong na a biktima a ni Pedro Teja Oriente, agtawen 51, agpada a residente iti nadakamat a barangay.
Segun pay iti Philippine National Police iti ili ti San Nicolas, nairekomendar ti 200 a ribo a pisos para iti temporaryo a pannakawaya-waya ti nasao a suspek.
Maipalagip nga inlawlawag ni Police Capt. Randy Damo, ti chief of police iti ili ti San Nicolas, a rimuar iti imbestigasyon da nga addan ti dati a susik ti biktima ken suspek gapu iti maipagarop a sanikua.
Kuna na a naamoan da pay a tunggal agawid ti suspek a nabartek ket agkarkaryar.
Innayon na a sakbay a napasamak a panagtagtagbat ket kinaryar ti suspek ti biktima apaman a nakasangpet iti balayda a nakainom ti arak a nangitunda ti panagbinnara da.
Iti panagriri dagiti dua ket napan nangala ti buneng ti suspek iti uneg ti balay da ken intagbat na iti ulo, abaga ken dadduma pay a paset ti bagi ti biktima a nangitunda ti pannakatay na.
Agpapan kadagitoy a gundaway ket nagtalinaed paylaeng ti suspek iti Philippine National Police iti ili ti San Nicolas.
