LAOAG CITY – Napaluspusanen ti suspek ti pammagkong a ni Mark Edhel Baruso Del Rosario manipud iti pagbaludan ti Philippine National Police ditoy ciudad ti Laoag.
Segun ken ni Police Staff Sergeant Seymour Bellarmino, Duty Desk Officer ti PNP Laoag, daytoy ket kalpasan a nagbayad daytoy 72, 000 a pisos para iti temporario a panakawayawayana.
Ti panakpaluspus iti nasao a suspek ket babaen ti bileg ti Order of Release nga inparuak-at ni Vice Executive Judge Artemio H. Quidilla Jr, Regional Trial Court,a napetsaan idi kalman, December 22, 2022.
Maipalagip a napilaan ti kaso a Frustrated Homicide ti suspek gapo iti napasamak a pammagkong iti sango ti maysa a supermarket a sakupen ti Brgy. 10, ditoy ciudad ti Laoag.
Immunan ngem iti daytoy, bayat ti panag-cellphone ti suspek a nakapila iti Comfort Room idi simmangpet ti biktima ken saan na nga inpagarop a nakapila ti suspek gapo ta adda iti igid.
Naamoan nga idi simrek ti biktima iti comfort room ket nasdaaw ti suspek gapo ta isuna ket ummuna a nakapila a nangitunda metten ti saan da a panagkinnawatan.
Basar iti palawag ti biktima, maipagarop nga iinur-uray isuna ti suspek iti ruwar ti pasdek ken kinarkarit na daytoy agingga a nagkabil dagitoy ken inruwar ti suspek ti kutsilyo na nga adda iti belt na, nga agatiddog ti pito a pulgada ken binagkong na iti namindua a daras a nakatamaan ti ngato ti akin-kannawan a mata ken babaen ti akin-kannigid a barukong daytoy.
Iti agdama, ti biktima a ni Jansen Balitayo Ganutisi ket nagtalinaed iti Mariano Marcos Memorial Hospital and Medical Center nga agpapalaing.
