LAOAG CITY – Balligi a naarestaren ti maipagarup a suspek iti pammaltog a nakatayan ti ag-live-in partner iti Barangay 21 iti ili ti San Nicolas.
Ti maitudtudo a suspek ket kameng ti Philippine National Police, naasawaan, residente iti ili ti Badoc ken naka-deploy iti Ilocos Norte Police Provincial Office.
Basar iti inisyal nga imbestigasion, rumrummuar nga imon ken love triangle ti rason no apay a naaramid ti suspek iti nasao nga insidente.
Saan met pay a masinunuo no ti suspek ket isu ti mastermind wenno ti akin-utek mismo iti napasamak a pammaltog.
Maipalagip a dead on the spot dagiti ag-live-in partner nga isuda Barangay Kagawad Joshua Madamba, agtawen ti 27 ken ni Eloisa Jane Pagadoan Bonilla, agtawen ti 30 ken maysa nga Online Accounting Staff kalpasan a napaltu-paltogan.
Immuna iti daytoy, inpakaammo ni Mrs. Julieta Pagadoan, ina ni Eloisa Jane, kabayatan ti panagsasaritada iti sango ti pagtaenganda ket adda ti limmabas a nakamotorsiklo.
Inbatadna a saan a nagbayag ket nagsubli ken nagsardeng dagitoy iti mismo sangoanan ti pagtaenganda.
Inlawlawagna a ti immuna ket inpagarupda nga agi-deliver laeng dagiti nakamotorsiklo ti parcel kadakuada.
Nupay kasta, kunana nga apaman a linukatan dagiti suspek ti compartment ti motorsiklo ket ditoy nga inruarda ti paltog ken insigida a pinaltu-paltoganda dagiti biktima iti sumagmamano a daras.
Naammoan a posible a calibre 45 a paltog ti nausar iti nasao a krimen.
Iti agdama, agtultuloy ti naun-uneg nga imbestigasion dagiti otoridad mainaig iti pammaltog.
Kabayatanna, ikarkarigatan ti Bombo Radyo Laoag News Team a mangala pay ti naan-anay a detalye maipanggep iti daytoy babaen ken ni P/Capt. Sygman Benigno, Hepe ti San Nicolas Municipal Police Station.
