LAOAG CITY – Manamnama a mapilaan ti kaso a frustrated murder ken grave threat ti maysa nga abugado gapu iti panangpaltogna iti maysa a residente iti Barangay 13, Magat-Salamat ditoy siudad ti Laoag.
Segun ken ni P/Capt. Rudy James Jacalne, Deputy Chief of Police ti Laoag City Police Station, nabigbig ti biktima a Edmund Pasion, agtawen ti 55, naasawaan ken residente ti Barangay 13 Magat Salamat ditoy siudad ti Laoag ken tubo iti Barangay 14 Ester iti ili ti Vintar idinto a ti suspek ket maysa nga abugado nga agtawen ti 29 ken residente ti Barangay 13 ditoy siudad ti Laoag ken tubo iti Barangay 7-B ditoy siudad ti Laoag.
Inbatadna a basar iti inisyal nga imbestigasionda ket rumrummuar nga adda ti saan a nagkinnaawatan ti biktima ken suspek a nangitunda ti napasamak a pammaltog.
Inbatadna a napan laeng naganawa ti biktima iti maysa a grupo ken ti suspek ngem maipagarup a pinaltogan ti suspek iti naminsan a daras iti bukut ti biktima.
Inlawlawagna a nakumpiskar manipud iti suspek ti calibre 9mm a Glock 43X Pistol ken maysa nga empty magazine ti calibre 9mm.
Mainaig iti daytoy, inpakaammo ni P/Capt. Jacalne a nakarekobre dagiti otoridad ti uppat a kapsula ti calibre 9mm, maysa a cartridge case ti calibre 9mm ken maysa a deformed fired bullet ti calibre 9mm iti nakapasamakan ti insidente.
Maipalagip a mapan koma gumatang ti arak ti biktima a ni Edmund Pasion ngem pinaltogan daytoy ti suspek.
Immuna iti daytoy, naitaray iti Mariano Marcos Memorial Hospital and Medical Center iti siudad ti Batac ti biktima para iti naan-anay a pannakatamingna.
Iti agdama, nagtalinaed iti pagbaludan ti suspek iti Laoag City Police Station.
