LAOAG CITY – Manamnama a mapilaan ti kaso a parricide ken panaglabsing iti Republic Act 10591 wenno Comprehensive Firearms and Ammunition Regulation Act ti suspek ti kalpasan a pinaltoganna ti bukodna nga anak iti Brgy. 22 San Guillermo iti ili ti San Nicolas.
Segun ken ni P/Cpt Randy Damo, Hepe ti San Nicolas Municipal Police Station a desido nga agpili ti kaso ti ina ken kabsat ti biktima kontra iti suspek a ni Fermin Cabbat, agtawen ti 57, maysa a retired Army ken residente iti nasao a lugar.
Kinunana, nga agpapan ita a gundaway ket saan da pay a nabirokan ti paltog a nausar iti nasao nga insidente.
Maipalagip nga, inpakaammo ni Damo, agim-imon ti suspek iti asawana rason a nagprobokar daytoy iti pagtaenganda babaen ti panangiruarna kadagiti aruaten ti asawana ken pinuoranna dagitoy.
Mainaig iti daytoy, inlawlawagna a nakita ti maysa kadagiti anak dagiti agasawa ti napasamak isu a napanna dinanog ti rupa ti amana iti naminsan a daras.
Kunana a nakabusor ti ama isu a napanna met innala ti iduldulinna a paltog ket ditoy a pinaltoganna ti bukudna nga anak iti nagduduma a paset ti bagina iti sumagmamano a daras.
Innayonna a narekobreda iti nakapasamakan ti insidente ti dua a magazine ti 5.56 ken dua a magazine ti 7.62 pakairamanan ti lima a kapsula ti paltog.
Naammoan a naiwayatan ti suspek ti Search Operation idi 2014 a nakakumpiskaran ti paltog ken pagpabettak.
Iti agdama, nagtalinaed ti suspek iti kuerpo ti San Nicolas Municipal Police Station.
