LAOAG CITY – Naipilan ti kaso a direct assault ken attempted homicide kontra ken ni Marcel Ramirez Garo, residente iti Barangay 50, Buttong ditoy ciudad ti Laoag.
Immuna iti daytoy, napan nagresponde da Barangay Kagawad Nick Ventura Juan, agtawen ti 58 kadwa na ni Mr. Rizal Ranada Daquioag, agtawen ti 48 gapu iti panagprob-probokar ni Garo a nakaiggem ti buneng ken daytoy ket nabartek.
Nupay kasta, imbes nga agsardeng ti suspek ket inwasiwas na ti buneng nga agatiddog ti 17 a pulgada a nakasugatan ti rupa ni Barangay Kagawad Juan idinto a nasugatan met ti abaga ni Daquioag.
Naamoan a dagiti barangay tanud ti nangtiliw ken ni Garo kalpasan na ket napanda inyendorsar iti Philippine National Police ditoy ciudad ti Laoag.
Iti agdama, nagtalinaed paylaeng ti suspek iti Governor Roque Ablan Senior Memorial Hospital ditoy ciudad kalpasan a nagsagaba kadagiti sugat ken kamuol babaen kadagiti nangtiliw kenkuana a barangay tanud.
Kabayatanna, kalpasan ti pannakaagas ti sugat dagiti biktima ket napalubusan da metlaeng a nagawid a dagus.
