LAOAG CITY – Maipila ita nga aldaw wenno kadagiti sumarsaruno nga aldaw ti kaso a murder ti suspek iti napasamak a panagtagtagbat a nakatayan ti maysa a mannalon iti Barangay Sta. Rita iti ili ti Paoay iti kallabes.
Daytoy ti kinumpirmaran ni Pol. Maj Sheryll Guzman, ti chief of police iti ili ti Paoay.
Segun kenni Guzman, malaksid iti maysa a suspek da ket mabalin nga adda pay ti kadwa daytoy basar iti imbestigasyon da.
Inpalgak na a no ti pagibasaran da ket dagiti ado a sinagaba a sugat ti biktima a ni Marlon Cochapin ket saan a kabaelan nga aramiden ti maymaysa laeng a tao.
Nagkedked paylaeng ni Guzman a nangipaay ti detalye seknan iti pakabigbigan ti suspek ken saan da pay a masinunuo no ania a klase ti patadem ti nausar iti krimen.
Maipalagip a nakita laengen ti bangkay ti mannalon a ni Cochapin iti kamaisan iti nasao a barangay no sadinno ket nagsagaba ti ado a sugat iti nagduduma a paset ti bagi na.
Naamoan a nagpakada ti biktima a mapan na kitaen ti mula na a mais a pinadanoman na ken rumrumuar nga iti kallabes ket adda ti maipagarop a nakariri daytoy gapo iti pannangan dagiti taraken a dingwen iti mula na a mais.
Ummunan a naireport nga idi nakita ti biktima iti kamaisan ket addan ti uppat agingga iti innem nga orasen a natayen basar iti Rural Health Unit (RHU) iti nasao nga ili.
