LAOAG CITY – Saan pay nga ammo ni Barangay Chairman Joseph Bitagon iti Barangay Balatong ditoy ciudad ti Laoag no anya ti rason no apay a tinagbat ni John Francis Baustista Bitagon ti uliteg na a ni Alex Domingo Bitagon.
Daytoy ket gapo ta basar iti impormasyon a naipadanon kenkuana ket nagsarsarita pay laeng dagiti dua no sadinno awan met ti nagriryan da isut gapo na a masdaaw ti pamilya ti biktima no apat a tinagtagbat ti suspek daytoy nangruna ket matmaturugen idi napasamak ti insidente.
Segun kenni Kapitan Bitagon, kalpasan ti panangtagtagbat ti suspek iti biktima ket nagtaray agingga a kinamat da ngem iti panagresponde dagiti otoridad ket saan pulos nga agpaanawa.
Inlawlawag na a sinursurot dagiti otoridad ti suspek a nakaiggem ti buneng ken bato agingga a nakadanon da iti Sitio Nalasin no sadinno idi na-corner ket ginandat na a darupen dagiti pulis isut gapo na a napilitan dagitoy a nangpaltog kenkuana.
Inbatad na nga uppat a putok ti paltog ti nangeg da ken ti tama ni John Francis Bigaton ket iti luppo, abaga ken iti buksit na.
Mainaig iti daytoy, kuna ti kapitan a ti suspek ket kanayon nga agin-inom ngem idi nagsarita da sakbay ti insidente ket patien na a saan a nakainom ti nasanger daytoy ngem adda ti naibaga ti maseknan kenkuana nga “ado ti kabutbuteng na ken mapagtitinnulungan daytoy”.
Kabayatanna, inbatad ti kapitan nga idi bulan ti Mayo ket ginandat ni John Francis Bitagon ti nagpakamatay gapo iti maipagarop nga ado ti mangburburibor kenkuana.
