LAOAG CITY – Napilaanen ti kaso babaen ti regular filing ti suspek ti napasamak a panagtagbat iti Brgy. 6 ditoy ciudad ti Laoag.
Daytoy ti inbatad ni Police Lt. Vol. Ryan Retotar, ti chief of police ditoy ciudad ti Laoag.
Nabigbig ti biktima nga agtawen ti 35, awanan ti asawa taga Brgy. 6 ditoy ciudad ngem agdama nga agnanaed iti Brgy. 54-B Camangaan, idinto a ti suspek ket agtawen ti 41, babai, addaan ti live-in partner Ken residente iti Brgy. 6 ditoy ciudad ti Laoag.
Naamoan a ti biktima ken suspek ket agkasinsin.
Iti imbestigasyon, nagturong ti biktima iti family house da ken maipagarop a nagkariar nga isu met ti nakapungtotan ti kasinsin na a suspek Ken dadduma pay a miembro ti pamilya.
Kabayatanna, iti panangitulnog ti dadduma a miembro ti pamilya ti suspek nga ipan iti gate ket nangpidot paylaeng ti bote ti arak ken inbarsak na, ditoy metten a nangala ti suspek ti buneng ket inwasiwas na a nakasugatan ti buksit ti biktima.
Naitaray ti biktima iti Black Nazarene Hospital babaen kadagiti nagresponde a barangay tanud idinto a nagtalapwagaw ti suspek kadwa na ti live-in partner na babaen ti panaglugan da ti tricycle.
Kabayatann, ti buneng a nausar iti panagtagbat ket agatiddog ti 12 a pulgada.
