LAOAG CITY – Iyur-uray ti Philippine National Police ti isusuko ti suspek iti napasamak a pammaltog iti Barangay Sta. Cruz Sur iti ili ti Badoc.
Daytoy ti inbatad ni Police Captain Elison Pasamonte, ti chief of police ti Philippine National Police iti nasao nga ili.
Segun ken ni Pasamonte, adda ti pakaammo ti pamilya ti suspek a naallukoy da daytoy a sumukon tapno sangwen na ti aniaman a reklamo a naipila kontra kenkuana gapu iti panangpaltog na iti kasinsin na.
Inpakaammo ni Pasamonte a ti inpila da a kaso kontra iti suspek ket attempted murder.
Nupay kasta, rumrumuar a saanen nga interesado pay ti pamilya ti biktima a mangipursige iti kaso kontra iti suspek gapu ta agkakabagyan da.
Maipalagip a nasugatan ti biktima nga agtawen ti 32, maysa a mannalon ken residente iti Sitio 4 iti nadakamat a barangay kalpasan a pinaltugan ti kasinsin na nga agtawen ti 32.
Immunan nga inrakurak ni Pasamonte a basar iti inisyal nga imbestigasyon da, prinobokar ti biktima ti kasinsin na a babai a kabbalay na met laeng agingga a nagpatulong ti maseknan iti kasinsin da nga isu ti suspek.
Gapo iti daytoy ket napan naganawa ti suspek ngem saan latta a nagtalna ti biktima isut gapo na a nagawid ti suspek ken idi nagsubli ket addan ti iggem na a paltog agingga a pinaltogan nan ti biktima.
Naamoan a kalpasan daytoy ket nakita ti dara-dara a biktima iti asideg ti bubon da iti likod ti pagtaengan da.
Inbatadna a gapo iti pannakapaltog ti biktima ket natamaan ti bukot na ken naitaray iti Sto. Cristo Milagroso Hospital iti ili ti Sinait nga iti agdama ket addan iti nasayaat a kondisyon.
Nakarekobre met dagiti otoridad ti maysa a kapsula ti kalibre 45 a paltog iti nakapasamakan ti insidente.
Mainaig iti daytoy, kalpasan ti krimen ket dagus a naglibas ti suspek ken tugot na ti paltog nga inusar na.
