LAOAG CITY – Masdaaw met ni Sammy Alejo no apay nga isuna ti maitudtudo ita a suspek iti pammaltog idinto nga adda laeng iti pagtaengan da iti dayta a gundaway.
Segun kenni Alejo, simmangpet ti uliteg na manipud iti ili ti Piddig nga isu ti rason no apay a nagparti da ti manok ken naggi-inom da.
Kunana nga idi napan ti kagawad ti barangay iti balay da ken naibaga ti maseknan nga isu ti maitudtudo a nangpaltog kadagiti biktima ket ado dagiti nangikalintegan a saan a pimmanaw iti balay da.
Inbatad na nga iti laksid a naibaga kenkuana a saan nga umad-adayo ket napan nakiinom iti Barangay Mandaloque gapo iti sakit ti nakem na nga isu ti nakatiliwan na.
Kunana a masdaaw pay gapo ta ti nanggammat kenkuana ket ti maysa met laeng a kadua da a makiinom bayat a nakabatog da iti balay ti kapitan ken naibaga kenkuana a saan nga agkutkuti daytoy.
Dinakamat na nga idi nagammatan isuna ket maipagarop nga adda metten ti magazine nga addaan ti lima a bala ngem inpetteng na a saan na a kukua daytoy ken idi kumita iti aglawlaw na ket addan dagiti pulis.
Inpalgak na nga awan met ti riri iti nagbaetan da kadagiti biktima ken awan ti ammo na a basol na kadakuada rason a masdaaw no apay nga isu ti maitudtudo.
Kinumpirmaran na nga ummunan a nabalod isuna gapo iti kaso a murder.
Innayon na nga ilaban na nga inosente isuna iti napasamak a pammaltog.
