LAOAG CITY – Naipisuken iti Ilocos Norte Provincial Jail (INPJ) ti suspek iti panagtagbat iti Barangay Escoda iti ili ti Marcos kalpasan a napilaan ti kaso a murder.
Daytoy ti inbatad ni Police Major Joemar Andres, ti chief of police iti nasao nga ili.
Nupay kasta, kiniddaw ti suspek a ni Reymundo Fernando Lorenzo, agtawen iti 54, naasawaan ken residente iti nadakamat a barangay ti pannakaipatungpal ti preliminary investigation para iti naan-anay a pannakaimbestigar iti kaso na.
Namonganay ti kaso ni Lorenzo kalpasan a tinagbat na ti uliteg na a ni Florendo Lorenzo, agtawen iti 61 a poon metten ti nakatayan ti biktima.
Immuna iti daytoy, iti imbestigasyon dagiti otoridad ket nagriri dagiti aguliteg bayat ti panaggiinom da iti balay ni Hilario Malapit iti metlaeng nadakamat a barangay.
Nagawid ti suspek tapno saanen a kumaro ti sitwasyon ngem kalpasan ti 20 a minutos ket napan sinaruno ti biktima ken ditoyen a napasamak ti nasao a krimen.
Naitaray ti biktima iti Doña Josefa Edralin Marcos District Hospital iti ili ti Marcos ngem naideklarar a dead on arrival gapu iti nakana a sinagaba na kangrunaan na iti akin-kannigid a tengnged na.
Inpakaammo ni Andres a siguden nga adda ti susik iti nagbaetan ti biktima ken suspek ngem saanen nga indetalye pay ti opisyal.
