LAOAG CITY – Sinukonen ti Municipal Disaster Risk Reduction and Management Council ti Bolinao, Pangasinan dagiti tallo nga agkakabagian a mangngalap kalpasan a nasarakanda nga agtatapaw iti kabaybayan a sakupen ditoy Ilocos Norte.
Nabigbig dagitoy nga isuda Corajel Carolino, agtawen iti 58; Ace Carolino, agtawen iti 36 ken Ramon Fernandez, agtawen iti 58 nga agpapada dagitoy a residente iti ili ti Bolinao, Pangasinan.
Segun ken ni Lt. Joseph Christian Sagun, Provincial Commander Coast Guard ti Ilocos Norte, basar iti pannakisarsaritana kadagiti maseknan a mangngalap ket gagem dagitoy a makakalap ti adu nga ikan sakbay a dumuprak ti Bagyo Enteng.
Nupay kasta, kunana nga apaman nga agsubli dagitoyen idiay Bolinao, Pangasinan nga aggapuda idiay Magsingal, Ilocos Sur ket nasabatda ti napigsa a tudo ken dakkel a dalluyon agingga a nakadanonda iti kabaybayan a sakupen ditoy Ilocos Norte.
Maipalagip a nagbaliktad ken naarinebneb ti bangka dagiti mangngalap gapu iti napigsa a tudo ken dakkel a dalluyon no sadinno a kimmapetda laeng iti bangkada.
Naammoan a ti laeng tudo ti inpapaunegda iti uneg ti tallo nga aldaw a nagtatapaw dagitoy iti taaw.
Immuna iti daytoy, nakita ti maysa a transiting vessel nga MV Zarita nga agturong idiay Indonesia dagiti nasao a mangngalap.
Kabayatanna, nagyaman ni Ms. Cherish Caligtan, Municipal Disaster Risk Reduction and Management Council idiay Bolinao, Pangasinan ti panangakomodar ti Philippine Coast Guard – Ilocos Norte kadagiti kailianda a mangngalap.
