LAOAG CITY – Kinumpirmaran ni Doctor Melvin Manuel, ti mangidadaulo iti City Disaster Risk Reduction and Management Council (CDRRMC) ditoy ciudad ti Laoag nga idi pay parbangon kalman a nakaawid iti pagtaengan da dagiti mangngalap a taga Barangay Pangil iti ili ti Currimao nga immunan a maipagarop a nagpukaw kabayatan ti kaadda da iti baybay a paset ti Barangay Caoacan ditoy ciudad.
Inlawlawag ni Manuel a basar iti pannaki-koordinar na kadagiti kameng ti Philippine Coastguard iti ili ti Currimao ken Bacarra ket naamoan nga idi pay alas-dos ti parbangon idi kalman a nakasangpet iti pagtaengan da dagiti nasao a mangngalap.
Inbaga na a basar iti palawag dagiti mangngalap, iti oras ti alauna ti malem idi oktubre 6 ket napan da iti ili ti Bacarra tapno agkalap ken idi alas-tres ti malem iti dayta met laeng nga aldaw ket immakar da iti Barangay Caoacan ditoy ciudad ti Laoag.
Kuna ni Manuel a kabayatan ti panagipakat dagiti mangngalap ket arigna agpaypayapay da nga isu ti nakita dagiti residente iti nadakamat a barangay isut gapuna a nagpatulong da kadagiti kameng ti Philippine Coastguard ken MDRRMC.
Maipalagip a nagpatpatnag ken nagmalmalem a nagbiruk dagiti kameng ti PCG kadagiti nasao a mangngalap gapu ta inpagarop da a dagitoy ket mapukpukaw kalpasan a nakita dagiti residente iti Barangay Caoacan ditoy ciudad ti maipagarop a panagpaypayapay da kabayatan ti kaadda da iti tengnga ti baybay.
Naamoan laeng dagiti kameng ti PCG a nakaawiden iti balay da dagiti mangngalap kalpasan a napan nagsursur kadagiti coastal areas iti ili ti Currimao ken nagdamdamag da no adda dagiti mangngalap a timmapod iti baybay.
Inpakaammo ni Manuel a saan nga ammo dagiti nasao a mangngalap ti panangbirbiruk kadakuada dagiti kameng ti PCG.
Innayon ni Manuel a pakonswelo lattan kadakuada a naamoan da a natalged ti kasasaad dagiti nasao a mangngalap.
