LAOAG CITY – Naipilan ti kaso a panaglabsing iti Comprehensive Dangerous Drug Act of 2002 babaen iti inquest proceeding kontra iti subject ti drug buy-bust operation a ni Mr. Glenford Menor, agtawen ti 41, mannalon, naasawaan, ken residente iti Brgy. 16, Quiling Sur iti ciudad ti Batac.
Iti interview ti Bombo Radyo Laoag ken ni Menor, inadmitir na nga aglaklako iti maipawil a droga ngem saan pay a nabayag ti operasyon na.
Nadakamat pay ni Menor no taga ano ti supplier na ngem saan a kayat ti Philippine Drug Enforcement Agency a maipublikar pay.
Naamoan a negatibo iti illegal a droga ni Menor ngem positibo ti resulta ti naala kenkuana nga ebidensya.
Ni Mneor ket maibilang kas Top 8 Drug Personality iti Ilocos Norte ken daytoy ket dati a barangay tanud iti Brgy. 16, Quiling Sur iti ciudad ti Batac.
Maipalagip a natiliw ni Menor kalpasan a naglako ti maysa a sachet a naglaon ti maipagarop a shabu iti nagpammarang a poseur-buyer.
Nakumpiskar pay iti ikot ni Menor ti maysa a sangaribo a pisos, P9,000 boodle money ken ti Samsung keypad a cellphone na.
Iti agdama, nagtalinaed ni Menor iti kustodyar ti Philippine National Police iti ciudad ti Batac.
