LAOAG CITY – Nasukatanen ti transformer iti Brgy. Pulangi iti ili ti Bacarra a nabayagen a problema dagiti residente.
Segun kenni Assistant General Manager Perry Martinez iti Ilocos Norte Electric Cooperative, malaksid iti daytoy ket i-load measure da amin dagiti transformer tapnu masukatan pay dagiti dadduma.
Kunana a daytoy ket agdama a programa ti INEC tapno masigurado a napintas ti distribusyon ti kuryente iti tunggal pagtaengan.
Innayon na nga usto laeng nga inpakaammo ni Barangay Chairman Casimiro Galicinao ti problema da iti INEC tapno masolusyonan a dagus.
Inpakaammo ni Martinez nga adda ti immuna a panangsukat da iti transporfer ngem naperdi isut gapuna a sinukatan da manen.
Kabayatanna, nagyaman ni Kapitan Galicinao iti INEC nga idadaulwan ni Martinez, kasta pay kada Atty. Nikki Pilar ken ti ama na a ni dati a Vice Mayor Douglas Pilar.
Naamoan a 20 a pamilya ti apektado ti saan nga usto a kapasidad ti transformer iti nasao a barangay.
