LAOAG CITY – Inlawlawag ti maysa kadagiti nagbalin a biktima ti P2P Investment Company a nagpabigbig laeng ti nagan na a “Michael” no kasanu a naallukoy a naginvest iti daytoy.
Kuna na a naguyugoy ti rikna na gapu ta immuna a nakimiembro ti pagayam na ket nakaaw-awat met idi un-unana, ngem isuna ket saan pulos a nakaawat.
Naikari kadakuada a no mano ti i-invest da ket agdoblen to daytoy kalpasan ti 60 nga aldaw.
Inbatad na a no pagtitipunen na dagiti naited na ket umabot ti 50 ribo a pisos.
Inpasingked na a pursigido met a mangipila ti reklamo kontra kadagiti adda iti likudan ti P2P Investment, ken naragsaken no makita na a mapagsungbat dagiti maseknan.
Immuna iti daytoy, boluntaryo a simmuko iti National Bureau of Investigation (NBI) ti maitudtudo a mangidadaulo ti P2P Investment company a ni Angelica Joyce Nacino, naasawaan ken residente iti ili ti Pasuquin, ngem nagpabigbig iti nagan a Katherine Joyce Ubaza nga agop-operar ditoy probinsya gapo kadagiti maaw-awat na a pangta iti biag.
Dagus met a nagturong dagiti nakaad-ado a maipagarop a nagbalin a biktima ti kompanya iti NBI idi naamoan da ti panagsuko ni Nacino.
Iti agdama, umaboten ti nasurok a 80 ti naalaan ti NBI ti affidavit kontra iti nasao nga investment company.
Manamnama a manayunan pay ti bilang dagiti mapan agreklamo.
Mapatta-patta met nga umabot ti 5 a milyon a pisos ti naukkon ti nasao a kompanya manipod kadagiti maipagarop a nagbalin a biktima da.
Nagtalinaed met iti kustodyar ti NBI ti maitudtudo a lider ti nasao nga investment company a ni Nacino.
