LAOAG CITY – Inbatad ni Police Major Jephre Taccad, ti chief of police iti ili ti Pinili a malaksid iti reklamo a frustrated murder ken Direct Assault Upon a Person Authority, ket possible a pilaan da pay ti panaglabsing kadagiti pagalagadan ti quarantine dagiti uppat a lallaki a nangkabkabil ti maysa a barangay agawad iti Barangay Liliputen iti nasao nga ili.
Nabigbig ti biktima a ni Barangay kagawad Marlon Agdeppa y Valera, agtawen ti 38 idinto a dagiti suspek ket isuda Jayson Yarcia y Agalud-od, agtawen ti 34; Mark John Lacaba y Castillo, agtawen ti 18; Diether Jake Yarcia, agtawen ti 21; ken Jansen Yarcia y Dulig, agpapada nga awanan ti asawa ken residente dagitoy iti nasao a barangay.
Immunan a naireport a kabayatan a nakaduty ti barangay kagawad iti Barangay covered court da ket kellaat lattan a napan rimmaot dagiti suspek ket nagrarangasan da a kinabkabil ti biktima.
Inbaga ni Taccad a rumrumuar iti imbestigasyon da a ti nangkabkabilan dagiti suspek iti biktima ket ti panangsita ti barangay kagawad kadakuada gapu iti panagiinom da iti kallabes.
Innayon ni Taccad a basar iti kapitan ti barangay ket maibilang a sakit iti ulo iti lugar da ni Jayson Yarcia a datin a natiliw gapu iti illegal a droga.
Naamoan a nakainom ti nasanger dagiti suspek idi napasamak ti insidente.
Nagtalinaed met iti kustodyar ti PNP iti ili ti Pinili dagiti suspek kabayatan a maisagsagana dagiti reklamo a maipila kontra kadakuada.
Kabayatanna, immapela ni Police Major Taccad a saan koma a dangran, bastosen ken pagsasawan ti agkakadakes a sarita dagiti opisyal ti barangay gapu ta isuda ti maysa kadagiti kangrunaan nga agtrabtrabaho tapno malabanan ti agdama a mapaspasaran a krisis a gubuay ti coronavirus.
