LAOAG CITY – Mapaayaban dagiti uppat a residente ti Brgy. Juan iti ili ti Solsona a napaturungan ti paltog iti Sangguniang Bayan iti nasao nga ili.
Segun ken ni Bise Mayor Jonathan de Lara iti ili ti Solsona, daytoy ket kalpasan a kalikagum ni Sangguniang Bayan Member Marvin Pascua, Chairman ti Committee on Peace and Order a maimbestigaran a naimbag no apay a na-dismissed iti Korte ti kaso ti maysa a lalaki a nangipaturong ti paltog kadagiti maseknan a residente.
Inbatadna a gapu iti daytoy ket arig awan ti serserbina ti inaramid dagiti pulis a natured a nangtiliw iti suspek iti laksid a narisgo ti pannakakemmegna gapu ta adda ti ikotna a paltog.
Inlawlawagna a masapol a mangisayangkatda ti naun-uneg nga imbestigasion babaen iti idadauloan a komite ni Pascua tapno saanen a maulit pay ti napasamak nga insidente nangruna ket maipangpangruna ti pannakatagiben ti aglawlaw ken dagiti umili tapno maiyadayo dagitoy iti risgo ti biag.
Kunana nga ita a lawas a maimbitaran dagiti maseknan iti konseho tapno ditoy a masaludsod dagiti kalikagumda a malawlawagan iti napasamak nga insidente iti kallabes.
Innayonna nga immunan a nangiyuswat ti Privilege Speech ni Pascua iti Regular Session ti Sangguniang Bayan iti ili ti Solsona pakaseknan iti nasao a pasamak.
Maipalagip a naipila ti kaso a grave threat with the use of firearm and illegal possession of firearm wenno ti Republic Act (RA) 10591 kontra iti lalaki a natiliw gapu iti maipagarop a panangipatpaturongna ti paltogna kadagiti uppat a residente iti Brgy. Juan iti ili ti Solsona ngem na-dismissed met laeng.
Immunan a naireport iti Philippine National Police iti ili ti Solsona, bayat nga agpadpadaya ni Alpie Jacobo y Quebral, agtawen ti 28, naasawaan ken residente iti Brgy. Juan iti nasao nga ili usar ti motorsiklo na a Yamaha Sniper 155 ket pinagsardeng ti suspek a ni Jerome Andres y Abadilla, agtawen ti 40, awanan ti asawa ken residente iti Brgy. Bagbag, Solsona bayat nga agtatakder iti likod ti lugan na a Toyota Fortuner.
Ditoy a maipagarup nga inbatad ti suspek nga agsarita da ken ni Jacobo kagiddan ti maipagarop a panangala na ti paltog na manipod iti lugan na ken inkasa na daytoy sakbay a ginandat na a paputukan ti biktima.
Nupay kasta, nakataray a dagus ni Jacobo a kimmamang iti kwerpo ti pulisya tapno maireport ti napasamak.
Kabayatanna, malaksid ken ni Jacobo ket maipagarop a pinaturungan pay ti suspek ti nabigbig a ni Emerson Hora y Salvador a residente iti Brgy. Juan iti nasao nga ili.
Rumrumuar nga iti dayta a gundaway ket naggapo ti suspek iti dalan nga asideg ti Iglesia Independiente ken apaman a nakadanon iti crossing ket nagsardeng ken dita nga intutok na ti paltog a nakakasa ken ni Hora sakbay a nagturong iti laud a direksyon.
Mainaig iti daytoy, maipagarop nga inpaturong pay ti suspek ti paltogna kada Santiago Cabaya y Consolacion ken ni Mary-ann Cabaya y Cudal nga agpada a residente iti Brgy. Juan.
Iti panagresponde dagiti otoridad ket natiliwda ti suspek no sadino a nakumpiskarda ti cal. 40 pistol a nakita a mismo iti passenger seat ti luganna nga addaan ti magazine ngem awan ti balana.
Basar iti imbestigasion dagiti otoridad ket rumrumuar a nabartek ti suspek idi napasamak ti insidente.
