LAOAG CITY – Kalikagom ni Vice Mayor Carlos Fariñas ditoy ciudad ti Laoag a maimbestigar a nasayaat ti akusasyon kontra ken ni Barangay Chairwoman Rhodalyn dela Cruz iti Barangay Lagui-Sail ditoy ciudad ti Laoag mainaig iti alegasyon a pagbalbalinen nan a balay ti barangay hall gapu ta maipagarop a kanayun nga isu ti pagturugan na.
Segun ken ni Fariñas, inpaima na ti imbestigasyon kenni Sang. Panlungsod Member Jason Perrera.
Mainaig iti daytoy, inpasigurado met ni Perrera nga adalen na a nalaing daytoy tapno ammu na no anya ti maiyannatop nga addang nga aramid da iti daytoy.
Kabayatanna, ummunan a naglikudan ni dela Cruz ti alegasyon no sadinno inpetteng na nga ado ti trabaho da iti barangay hall isut gapu na nga adda dagiti gundaway nga agovertime da tapno maileppas dagitoy.
