LAOAG CITY – Kwinestyunaran ni Vice Mayor Vicentito Lazo ditoy ciudad ti Laoag ti kaawan ti nakabil a kordon iti lawlaw ti ME Shopping Center kabayatan a maur-uram ti nasao a pasdek iti kallabes.
Inbaga ni Lazo a masapol a naikkan koma ti kordon ti lugar tapno makontrol ti panagdudupudop dagiti ado a tattao a mapan makiosyoso.
Inyarig ni Lazo idi nauram ti tiendaan ditoy ciudad ti Laoag no sadinno a mismo a ti mayor idi a ni Mayor Rodolfo Fariñas ti mismo a napan nangkordon iti nadakamat a lugar tapno saanen a makastrek dagiti tattao uray dagiti adda ti pwesto na iti merkado publiko.
Kuna ni Lazo a saan a napan idi maur-uram ti ME shopping center gapu ta saanna nga ammo ti makilaban iti apoy.
Nakaisem pay ni Lazo idi nakita na iti social media gapu iti kaadda dagiti inawagan na nga usyosero ken “election fever”.
Karaman pay a nagturong iti lugar ket ni dati a Mayor Chevylle Fariñas, Congresswoman Ria Fariñas, Mayor Michael Marcos-Keon, Konsehal Handy Lao, Konsehal Edison Bonoan ditoy ciudad ti Laoag ken dadduma pay.
Gapu iti saan a pannakaikabil ti kordon iti lugar ket manamnama ti pannaka-imbitar ti firemarshall ditoy ciudad ti Laoag tapno mapagsaludsudan mainaig iti daytoy a banag.
Kabayatanna, inlawlawag ni Fire Senior Inspector Ronald Castillo, ti firemarshall ditoy ciudad ti Laoag nga idi dumanon da iti lugar ket adon ti tao ken ti immuna a pinanunot na ket kasano da a malapdan ti apoy a dumanon iti sabali nga establisimiento.
Inkalintegan na a no dimmanon iti sabali nga establisimiento ket narigrigat dan a malapdan ken masebseban ti apoy.
Inadmitir na nga adda ti panagliway da iti saan da a panangkordon iti lugar ngem ti lad-adda a pinanunot na iti dayta a gundaway ket no kasanu da a malapdan ti apoy a kumamang iti kaabay ti pasdek nga establisimiento.
