LAOAG CITY – Inlawlawag ni Vice Mayor Jonathan De Lara a saanna a basol no apay a naibayag ti pannakaaprobar ti tricycle franchise ni Mr. Aristotle Tabrilla iti Brgy. Puttao iti ili ti Solsona.
Segun kenkuana, naipama daytoy a problema iti Committee on Transportation iti Sangguniang Bayan nga idadauloan ni Konsehal Anthony Ganal.
Inbatadna a naitantan ti pannakaiwayat ti inspection iti tricycle ti maseknan gapu ta adda ti napasamak a desgrasia.
Gapu iti daytoy, saan a mai-inspect ti komite iti nasao a tricycle gapu ta naka-impound iti Philippine National Police iti ili ti Solsona.
Inlawlawagna a nupay nakabayad ti maseknan kadagiti nagduduma a kasapulan a requirements ket saan pay nga inaprobaran ti Sangguniang Bayan ti tricycle franchise.
Kabayatanna, kuna ni Vice Mayor De Lara a saan a naipangpangruna ti maseknan a tricycle driver a mabenepisiaran ti programa para kadagiti Micro Small and Medium Enterprises gapu ta saan pay a naurnos ken nalpas ti tricycle franchise daytoy.
Maipalagip a nadismaya ni Ms. Mhariz Tabrilla iti Brgy. Puttao iti ili ti Solsona kalpasan a naikkat ti nagan ti asawana a ni Mr. Aristotle Tabrilla iti listaan kas maysa kadagiti benepisiario ti Ayuda sa Kapos ang Kita Program wenno AKAP ni Pres. Ferdinand Bongbong Marcos Jr.
Immuna iti daytoy, basar iti timmawag ken ni Mhariz manipud iti Municipal Social Welfare and Development Office ket inikkat ni Mayor Joseph De Lara ti nagan ti asawana gapu ta maipagarup nga agkomkomento daytoy ken friend-na ti dummy account nga Akron Hammer.
