LAOAG CITY – Inlawlawag ni Police Major Allan Emerson Dauz, ti chief of police ti PNP-Batac nga ummuna a makaswan dagiti nagannak dagiti menor de edad a matiliwan nga agiturturong ti motorsiklo.
Segun kenni Dauz, mapilaan to met laeng dagiti menor de edad ngem maiyuray laeng agingga nga agtawen da ti 18 sakbay a maituloy ti kaso.
Inbatad na a ti manamnama a pannakaipila ti kaso kontra kadagiti nagannak da John Lloyd Badua ken ni Christian Roy Moises Miguel, agpada a menor de edad ken residente dagitoy iti Barangay Quiling Norte iti ciudad ti Batac ket isu ti ummuna a kaso dagiti nagannak gapo iti panangipalubos da nga agmaneho ti motorsiklo dagitoy.
Maiplagip nga idi kalman ket natay da Badua ken Miguel kalpasan a nakadinnungpar da ti maysa a dump truck nga inturong ni Allen Steven Bartolome y Acacio, agtawen iti 34, taga Barangay 6, Parot idiay ili ti Vintar.
Kabayatanna, kuna ni Dauz nga intono Hunyo 2 ket adda ti maiyuswat a taripnong ken ditoy a mailawlawag dagiti nagduduma a linteg trapiko.
