LAOAG CITY – Kinumpirmaran ni Atty. Diosdado Araos, ti mangidadaulo ti National Bureau of Investigation (NBI) ditoy ciudad ti Laoag nga uppat a babbai ti na-rescue da manipud iti maysa a maipagarop a sex den iti Barangay Lydia iti ili ti Marcos.
Segun kenni Araos, ti suspek ket agnagan ti Primia Saclayan ken natiliw daytoy babaen iti entrapment operation kalpasan a nakaawat da ti impormasyon nga agibugbugaw ti babbai.
Inbatad na nga iti mismo a pagtaengan ti suspek ti agserserbi a sex den ken no adda ti tumawag kenkuana a customer ket ditoy met nga ayaban na dagiti babbai.
Kunana a dagiti biktima ket mai-turn over iti Provincial Social Welfare and Development Office ken dagitoy ti agbalin a witness kontra iti suspek.
Naamoan a nabayagen nga ar-aramiden ti suspek daytoy nga iligal nga aktibidad ken sumango iti kaso a panaglabsing daytoy iti RA 9208 wenno ti Anti-Trafficking in Persons Act of 2003.
