LAOAG CITY – Nauram ti uppat a balay iti Sitio Nagsango, Barangay Saud iti ili ti Pagudpud.
Daytoy ti inbatad ni SFO2 Keith Howell Cuepo, ti Municipal Firemarshall iti ili ti Pagudpud
Segun ken ni Cuepo, ti agtagikua kadagiti nauram a balay ket agkakabagyan ken dagitoy ket isuda Jefferson Pagurayan, Jerry Pagurayan, Joseph Pagurayan ngem ti caretaker na ket ni Nora Pagurayan, ken ni Sandro Llapitan.
Inpakaammo ni Cuepo a basar iti inisyal nga imbestigasyon da, ti possible a makitkita da a nangrugyan ti apoy ket iti kusina da Jefferson Pagurayan gapu ta sakbay iti napasamak nga uram ket adda dagiti nakakita nga adda ti asok manipod iti daytoy.
Innayon na nga alisto a dimmakkel ken nagkayamkam ti apoy gapu ta malaksid a napigsa ti angin ket labig pay ti bubungan dagiti dua a balay idinto a ti maysa ket naaramid amin iti light materials.
Saan pay a masinunuo ti Bureau of Fire Protection (BFP) iti ili ti Pagudpud no mano amin ti balor dagiti nadadael iti napasamak nga uram gapu ta manarimaan pay laeng ti imbestigasyon da.
