LAOAG CITY – Kinumpirmaran ni Gov. Matthew Marcos Manotoc nga adda ti uppat a baro a kaso ti covid-19 ditoy probinsya.
Basar iti statement nga inparuk-at ni Manotoc, ti maikainnem a pasyente weno IN-C6 ket agtawen ti 44, utility worker manipod iti Brgy. Saud iti ili ti Pagudpud, naidesignar iti quarantine facility ken nagpositibo iti sakit idi Hulyo 17.
TI IN-C7 ket agtawen ti 20, masikog, residente iti Brgy. 16 iti ili ti Vintar, naggapo iti Metro Manila ken agdama a naka quarantine iti Vintar.
Kabayatanna, ti IN-C8 ket agtawen ti 21, babai a nurse, residente iti Brgy, San Vicente ditoy siudad ti Laoag ken addaan ti exposure ti covid-19 idiay Metro Manila idinto a ti IN-C9 ket agtawen ti 24 a babai, residente iti ili ti Pagudpud ken nagbiyahe met laneg iti metro manila.
Immuna iti daytoy, kinumpirmaran ti lokal a gobierno ditoy siudad ti Laoag nga idi Hulyo 18 ket maysa a kameng ti Philippine Airforce manipod Metro Manila ti nagpositibo iti covid-19 ken saan a residente ditoy probinsya isut gapu na a saan a mainayun iti bilang dagiti nagpositibo iti Ilocos Norte.
Mainaig iti daytoy, amin dagiti uppat a baro a nagpositibo ti covid-19 ket asymptomatic.
Kabayatanna, nailockdown dagiti tallo a sitio iti Barangay Saud ken naipan iti quarantine dagiti nakapulapol da IN-C6 ken IN-C9.
Naipan metten iti quarantine facility iti ili ti Vintar ti nakapulapol ni IN-C7 ken dagiti nakapulapol ni IN-C8 ditoy ciudad ti Laoag.
Amin a pasilidad a naka-quarantinan dagiti nagpositibo ti virus ket naipan iti lockdown ken dagiti met nakapulapol dagiti pasyente ket manamnama a dumalan iti swab test.
Nupay kasta, inpasigurado ni Gov. Manotoc a naiget ti koordinasyon ti gobierno probinsial, local government units, medical facilities, ken ti Department of Health tapno mapaigetan dagiti preventive measures ken health protocols.
