LAOAG CITY – Natiliw dagiti uppat a jeepney driver idinto a nakalibas ti maysa gapu iti panagsusugal da iti uneg ti pampasahero a jeep nga addaan ti rota a Laoag-Batac-Paoay iti Central Terminal ditoy ciudad ti Laoag.
Nabigbig dagiti natiliw nga isuda Angel Asuncion Jr., agtawen ti 49, taga Barangay 20, San Pablo iti ili ti San Nicolas; Romulo Ilac, agtawen ti 54, taga Barangay 6 iti ili ti San Nicolas; Madison Valentino Guillermo, agtawen ti 48, residente iti Barangay 29 ditoy ciudad ti Laoag ken ni Antonio Pastor, agtawen ti 59, residente iti Barangay Buttong ditoy ciudad idinto a ti nakalibas ket ni William Paguirigan, taga Barangay 18 iti ili ti San Nicolas.
Segun ti report, naaktoan a mismo dagiti kameng ti pulisya ti panagay-ayam ti “tong-it” dagiti suspek iti maysa a pampasahero a jeep.
Nakumpiskar dagiti otoridad ti maysa a set ti baraha ken ti maipagarop a taya dagiti suspek nga umabot ti 550 a pisos,karaman dagiti personal a kwarta da.
Naamoan nga uray ti nakalibas a ni Paguirigan ket karaman latta a mapilaan ti reklamo.
