LAOAG CITY – Natiliw dagiti uppat a lallaki a naggiinom ti nasanger iti sango ti maysa a pagtaengan iti Juan Luna street, Brgy. 7-A ditoy siudad ti Laoag.
Nabigbig dagiti natiliw a da Francisco Valencia Mendez, agtawen ti 43, naasawaan; Melvin Valencia Mendez, agtawen ti 42, naasawaan; Jaypee Navarrete Fernandez, akin kukua ti pagtaengan, agtawen ti 34 ken agpapada a residente iti nasao a barangay kenni Robin Litao Baria, agtawen ti 36, baro ken residente iti Llanes street Brgy. 9 ditoy siudad ti Laoag.
Basar iti report manipud iti PNP Laoag, idi alas nuebe ti rabii idi Biernes ket nakita dagiti agpatpatrolya a pannakabagi ti linteg dagiti uppat a naggiinom iti pagtaengan ni Fernandez.
Gapu iti daytoy, ket sinita dagiti otoridad dagiti maseknan ngem inkalintegan ti maysa kadagiti lallaki nga adda da iti uneg ti pagtaengan.
Kuna ti maysa a lalaki a saan met a martial law ti mapaspasamak ngem quarantine laeng.
Nupay kasta, tiniliw dagiti otoridad dagiti uppat a lallaki agraman a kinumpiskar da ti maysa a shot glass, maysa a plastic a baso, pither, maysa a botelya ti gin, ken ti 750ml emperador lights nga adda ti nagyan na.
Nasalungasing dagiti uppat a lallaki ti Article 151 ti revised penal code wenno resistance and disobedience to a person in authority.
Nagtalinaed dagiti maseknan iti kustudyar ti PNP Laoag kalpasan ti pannakatiliw da.
