LAOAG CITY – Naarestar dagiti uppat a lallaki gapu iti illegal a panagsusugal da iti paset ti Brgy 17, PF Alviar, Vintar, Ilocos Norte.
Nabigbig dagiti suspek nga isuda Jay-ar Agtarap y Cabaddo, 33, baro, self employed, drug surrenderer; Freddie Gamiao y Bayani, 36, naasawaan, mannalon; Jonathan Padaca y Reyes, 31, baro, tricycle driver, ken ni Bryan Gapuzan y Agramon, 31, baro, mannalon, agpapada dagitoy a residente iti nadakamat a barangay.
Segun ti report, maysa a concerned citizen ti nagreport iti PNP mainaig iti panagay-ayam ti pusoy dos dagiti uppat a suspek iti siruk ti kayo ti mangga iti nasao a barangay.
Dagus a nagturong dagiti kameng ti pulisya kadwa da ni Brgy Chairman Rolando Reyes ken dadduma pay a barangay officials iti lugar a nakaarestaran da kadagiti suspek.
Nakumpiskar dagiti otoridad iti lugar ti maysa a set ti baraha, maysa a bedframe a naparabawan ti plywoods ken cash a Php739.00.
Iti agdama, nagtalinaed dagiti suspek iti kustodyar ti PNP iti ili ti Vintar kabayatan ti pannakaisagsagana ti reklamo a panaglabsing ti Presidential Decree (PD) 1602 wenno illegal a panagsusugal ken Republic Act (RA) 11332.
