LAOAG CITY – Naarestar dagiti 4 a lallaki iti Brgy. Elizabeth iti ili ti Dingras gapu iti illegal a panagsusugal partikular iti maysa a minatayan a saanen a nainaganan ti akinkukua ti maseknan a pagtaengan.
Segun ken ni Police Chief Master Sergeant Joseph Califlores, Officer In Charge ti Criminal Investigation and Detection Group wenno CIDG ti Ilocos Norte Police Provincial Office, agtawen dagiti natiliw ti 30 agingga 40, awanan ti pagtrabahoan, tallo kadagitoy ket residente iti sabali a Barangay ti Dingras idinto a ti maysa ket taga iti ili ti San Nicolas.
Inlawlawagna a ti natiliw a taga iti ili ti San Nicolas ket inawis ti barkadana nga agnanaed iti nadakamat a Barangay a nakatiliwan dagiti suspek.
Inbatadna nga apaman a nakaawatda ti impormasion nga adda dagiti agsusugal iti nasao a lugar ket dita a dagusda a napan minonitor iti uneg ti maysa a lawas agingga a napaneknekan ken naaktuaranda a pudno nga adda agay-ayam ti panagsusugal.
Kunana a nakumpiskar ti 4,155 pesos a nagbalin a pusta dagiti maseknan nga agsusugal, 4 a tugaw a monoblock, maysa a lamisaan, maysa a lupot nga agmaris ti puraw ken maysa a set ti baraha a nausar dagitoy iti panagay-ayamda ti Lucky 9.
Mainaig iti daytoy, kunana nga adda pay ti nasurok 10 nga indibidual ti nakalibas apaman a simmangpet dagiti otoridad iti lugar.
Innayonna nga ita nga aldaw ti pannakaipila ti kaso kontra kadagiti suspek gapu iti panagsalungasingda iti Presidential Decree 1602 wenno ti Illegal Gambling.
Nagkedked a mangted iti aniaman a reaksion wenno komento dagiti suspek pakaseknan iti daytoy a banag.
Kabayatanna, iInlawlawag ni Barangay Chairman Angel Bryan Arrelano iti Barangay Elizabeth iti ili ti Dingras nga adda ti dumandanon kenkuana nga impormasyon seknan iti panagsusugal iti minatayan.Nupay kasta, kunana a no mapan iti nasao a lugar ken agpatingga pay iti alas-onse iti rabii ket awan met ti agsusugal.
Segun kenni Arellano, posible nga idi nagawiden daytoy ket isu ti panagsusugal dagiti natiliw.
Segun kenni Arellano, kanayon na met a bagbagaan dagiti kabarangayan na partikular iti nagminatay a saan nga agpasugal gapo ta naiget a maiparit daytoy.
Kunana a daytoy met ti damo nga adda ti natiliw a panagsusugal iti minatayan iti barangay da.
Kabayatanna, nagpalagip ni Arrelano kadagiti kabarangayan na a saan da nga agsusugal gapo ta dagitoy met laeng ti agsagaba no matiliwan dagitoy.
