LAOAG CITY – Nagballigi dagiti otoridad a nangtiliw kadagiti uppat a lallaki iti naiwayat a dragnet operation ti paset ti Barangay 11, Darat iti ili ti Pinili.
Nabigbig dagiti suspek nga isuda Kevin Doropan y Sinio, taga Manila; Roland Igno y Jabatan, taga Pangasinan; Glen Tandoc y delos Santos, taga Tacloban ken ni Jimmy Gavino y Tapales, taga Pangasinan.
Basar iti report, immuna nga adda ti binudol dagiti suspek a maysa a baket, agtawen ti 89 iti paset iti ili ti Bacarra no sadinno a naala da kenkuana ti sumagmamano nga alahas kas ti kwentas, aritos, singsing, cash a 14 a ribo a pisos ken adda pay ti dolyar.
Gapu iti napasamak ket naki-koordinar a dagus ti Philippine National Police iti dadduma a municipal police stations karaman iti ili ti Pinili no sadinno nga iti naisayangkat a dragnet operation ket ditoyen a natiliw da dagiti suspek a naglugan ti maysa a Nissan nga agmaris ti grey.
Iti panagsukimat dagiti otoridad iti uneg ti lugan ket nakarekobre da ti lima a sachet a naglaon ti maipagarop a shabu, lima a pedaso ti foil paper, dua a lighter, facemask ken agmaris ti asul a mentos canister.
Kabayatanna, inadmitir ti maysa kadagiti suspek a binudol da ti baket iti ili ti Bacarra ngem naiget a naglikudan na dagiti naala nga illegal a droga iti nagluganan da.
Nagtalinaed dagiti suspek iti kwerpo ti pulisya iti ili ti Pinili para iti naan-anay pay a pannakaimbestigar da.
