LAOAG CITY – Inlawlawag ni PLt. Col. Rafael Lero, hepe ti PNP Laoag ti napasamak iti border chekpoint iti ili ti Badoc.
Daytoy ket pakaseknan kadagiti dua a negosyante manipod Urdaneta City, Pangasinan nga aggatang ti karne ti baboy ditoy probinsya a saan a nangipundo nga adda ti kadua da a dua a negosyante met laeng a babbai iti luganda.
Segun ken ni Lero, Pebrero 3 idi simrek ditoy probinsya dagiti maseknan a negosyante.
Kuna na nga apaman a nadanonda ti border checkpoint, dua laeng a lallaki dagiti bimmaba a nagipakita ti requirements ken dadduma pay a dokumento a kasapulan sakbay a makastrek ditoy probinsya.
Nu pay kasta, inbatad na a ti maysa kadagitoy ket nagpositibo iti antigen test ken kalpasan na ket ti RT-PCR test rason a naisolate ken dimmalan iti surveillance.
Inlawlawag na a kabayatan ti pannaka-isolate daytoy ket nadamag kenkuana nu adda dagiti kakadwa na ket dita nga inadmitir na nga uppat da a nagkakalugan a nagbiyahe ditoy probinsya.
Gapu iti daytoy, na-isolate da amin nga uppat ken dimmalan dagitoy ti RT-PCR test.
Kinumpirmaran ni Lero a basar iti City Health Office (CHO) ket positibo amin dagitoy iti covid-19.
Kabayatanna, inpakaamo ti hepe a posible a makasaon dagiti uppat a negosyante ti kaso a panagsalungasing ti Article 151 iti Revised Penal Code ken ti RA 11332 gapu iti gandat a pannakailibas a maiserrek ditoy probinsya dagiti dua a babai a negosyante.