LAOAG CITY – Kinumpirmaran ni Barangay Chairman Franklin Dela Cruz iti Barangay 29 ditoy ciudad ti Laoag a dagiti kaudian a nagpositibo iti virus nga isunda IN-C766 agingga iti IN-C769 ken agkakabbalay.
Segun kenni Dela Cruz, na-expose dagitoy kalpasan a ti manugang dagitoy nga agnaed iti ili ti San Nicolas ket napan nagpasyar iti pagtaengan da idi Pebrero 10.
Inbatad na a kalpasan daytoy ket nag-swab test ti nasao a maseknan ken ti resulta ti swab test ket rimwar idi Pebrero 16.
Kunana a kalpasan a naamoan na daytoy, dagus da nga in-siolate ti pamilya ken dimmalan dagiti lima a miembro iti swab test idi Pebrero 18.
Rimwar laeng ti resulta idi kalman, Pebrero 20 no sadinno a dagiti uppat ti nagpositibo iti virus idinto a negatibo ti maysa kadagitoy.
Iti agdama, dagiti uppat ket naipan iti isolation unit ti ditoy ciudad ti Laoag idinto a ti nagnegatibo ket adda iti pagtaengan da ken ileppas na ti 14-day quarantine.
Innayon na a dagus met a naiyuswat ti contact tracing ken intono bigat ket dumalan dagitoy iti swab test.
Kabayatanna, inpakammo ni Dela Cruz nga uppat a pamilya ita iti nasao a barangay da ti naka-lockdown.
