LAOAG CITY – Inpannakkel ni Ms. Mylene Pascual, mangidadaulo iti City Environment and Natural Resources Office ditoy ciudad ti Laoag dagiti pammadayaw a naawat da kabayatan iti naisayangkat a 10th Ecological Award Solid Waste Summit idiay San Carlos City, Pangasinan.
Segun kenkuana, uppat dagiti pammadayaw a naawat iti lokal a gobierno ditoy ciudad ti Laoag.
Inpakaammo na a dagitoy ket ti Solid Waste Management Innovation Leadership Award, Outstanding Stewardship and Local Governance, Green LGU Award for waste Diversion ken Excellence in Enforcement Implementation.
Inbatad ni Pascual a nagun-od da dagitoy a pammadayaw gapu iti panagkikinamayet dagiti nagduduma nga ahensia ti gobierno ditoy ciudad, pakairamanan dagiti barangay iti babaen ti liderato ni Mayor James Bryan Alcid .
Kabayatanna, inpanamnama ni Pascual iti agtultuloy a pannakaimplementar dagiti linteg ken pagannurutan maipanggep iti pannakamanihir a nasayaat dagiti basura ditoy ciudad ti Laoag.
