LAOAG CITY – Nagpiyansa iti sag-30 a ribo a pisos dagiti uppat a senior citizen ken maysa nga agtawen ti 56 kalpasan a natiliw dagitoy gapu ti panagsusugdal da ti Mahjong iti Brgy. 15 ditoy siudad ti Laoag.
Iti naiyuswat nga operasyon dagiti otoridad, naduktalan da ti panaggaayam iti mahjong dagiti uppat a senior citizen ken maysa a lalaki, tallo a babbaket ken maysa a lakay.
Gapu iti daytoy, natiliw dagiti maseknan agraman ti pannakakumpiskar ti kumpleto a mahjong tiles, mahjong table, tugtugaw ken 1,616 a pisos a pusta dagitoy.
Segun kenni Police Lt. Col. Jomar Labiano, hepe ti PNP Laoag, nakaawat da ti report seknan ti agsusugal babaen ti panagay-ayam da ti mahjong iti nasao a barangay.
Dagus a nagpiyansa dagiti maseknan kalpasan a naipila ti panaglabsing ti PD 1602 wenno Anti Illegal Gambling Law ken nawaya-wayaan dagiti maseknan.
Nagpalagip ni Labiano iti publiko a saan nga agsardeng ti PNP agingga a saan nga agsardeng dagiti agisaysayangkat ti iligal a panagsusugal.
