LAOAG CITY – Nabigbigen dagiti kameng ti Philippine National Police (PNP) ti dua kadagiti uppat a suspek iti pannakapaltog ni Kerwin Pasion, quarry checker ken residente iti Barangay Juan iti ili ti Solsona.
Daytoy ti kinumpirmaran ni Police Major Jephre Taccad, ti pannakangiwat iti llocos Norte Police Provincial Office (INPPO).
Immunan nga inbatad ni Police Lt. Belen Boait, chief of police iti ili ti Solsona a maysa kadagiti dua a nagserbi a lookout ket naka-ospital arrest kalpasan a natamaan ti naiwawa a bala idinto a ti maysa ket nakalibas.
Rumrumuar a napan inabay ti maysa a pointman ti biktima ken iti panangpaltog ti kadwa da ket nairaman daytoy a natamaan.
Naduktalan laeng dagiti otoridad a ti maysa a napaltugan ket kadwa dagiti suspek gapu ta binigbig a mismo ti biktima a daytoy ti nangitudo kenkuana.
Inbatad ni Taccad a basar iti imbestigasyon ket ti kangrunaan a makitkita da a motibo iti pannakapaltog ni Pasion ket adda ti pannakainaig iti trabaho na.
Innayon ni Taccad a nupay maibilangen a nasolbar ti kaso ket nasaysayaat met laeng no mabigbig pay ti kinatao dagiti dua a gunman ken no possible nga adda ti mastermind iti napasamak a krimen.
Naipila metten ti kaso a frustrated murder babaen iti online inquest kontra kadagiti uppat a suspek iti pannakapaltog ni Pasion.
Maipalagip a nagsagaba ti sugat ti biktima kalpasan ti pannakapaltog na iti kallabes.
