LAOAG CITY – Nagsagaba ti sugat iti nagduduma a paset ti bagi dagiti uppat a tattao iti panagdinnungpar ti dua a motorsiklo iti by-pass road bisinidad iti Barangay 57, Pila ditoy ciudad ti Laoag.
Nabigbig ti nangiturong ti maysa a motorsiklo a ni da James Paul Madriaga y Agustin, agtawen ti 20, residente iti Barangay 23 ditoy ciudad ken ti lubbon na ket ni Elaine Rose Tevar, agtawen ti 19, balasang ken residente iti Barangay Darupidip iti ili a Pasuquin, idinto a ti nangiturong ti maysa a motorsiklo ket agtawen ti 14, residente iti Barangay 62-A ditoy ciudad, lubbon na met ni Jayjay Icalia, agtawen ti 26 ken taga Barangay Talingaan iti nasao a ciudad.
Iti imbestigasyon, bayat ti panagpapa-amyanan a direksyon da Madriaga ket aksidente a nakadinnungpar da ti motorsiklo a nagluganan ti menor de edad a nangitunda ti pannakatulid dagiti dua a behikulo.
Naitaray a dagus dagiti biktima iti Governor Roque Ablan Senior Memorial Hospital (GRASMH) ditoy ciudad ti Laoag para ti naan-anay a pannakataming da.
Naamoan a dagiti dua a nangiturong ti motorsiklo ket agpada a nakainom ti nasanger.
