LAOAG CITY – Natiliw dagiti uppat a tricycle driver gapu iti panagsusugal iti Brgy. Baay iti Siudad ti Batac.
Daytoy ti kinumpirmaran ni Police Corporal King John Sabado, ti Imbestigador iti nasao a kaso.
Segun kenkuana, daytoy ket kalpasan nga adda naawatda a report manipod iti maysa a concern citizen a maipagarup a masansan dagitoy nga agsusugal.
Gapu iti daytoy, dagusda a napan kinita ti lugar ket ditoyda a naduktalan ken naimatangan nga agsusugal dagiti maseknan iti likod ti maysa a pagtaengan a nalimed.
Kunana a dagiti tallo a suspek ket agpapada a residente ti Brgy. Baay idinto a ti maysa ket taga Brgy. Quiling Sur iti nasao a Siudad.
Inbatad ni Police Corporal Sabado, nakumpiskar ti 3,550 pesos a nagbalin a taya dagiti nagsusugal pakairamanan ti 40 pcs. a cards ti baraha a pinagay-ayamanda ti Lucky 9, uppat a tugaw ken maysa a lamisaan a nausar iti panagsusugalda.
Inlawlawagna a manamnama a sumango dagiti uppat a suspek ti Presidential Decree 1602 wenno Anti-Illegal Gambling Law.
Kunana a mabalin nga agpiyansa dagiti nasao a suspek ti tallopulo a ribu a pisos kas sukat iti temporario a pannakawayawayada no bilang aprobaran daytoy ti Provincial Prosecutor’s Office.
Kabayatanna, innayon ti Imbestigador a nagtalinaed dagiti suspek iti pagbaludan ti kuerpo ti pulisia.
