LAOAG CITY – Kinumpirmaran ni Mr. Christian Andrew Rillorta, Information Officer iti Social Security System (SSS) Region 1 nga adda ti uppat nga employer ditoy probinsya ti maipagarop a saan a nagbayad ti kontribusyon dagiti empleado da.
Segun kenni Rillorta, dagiti employer ket manipud ditoy ciudad ti Laoag, ili ti Solsona, Marcos ken San Nicolas.
Inlawlawag na a gapo iti daytoy ket nabilin dagiti maseknan nga urnusen ti nasao a problema.
Inbatad na a nagduduma a rason ti inbaga dagiti employers no apay a saan a nabayadan ti kontribusyon dagiti empleado kas iti panagserra ti negosyo wennp nagikkat iti empleado gapo iti pandemya.
Dinakamat na a maawatan met ti SSS ti kasasaad dagitoy isut gapo na nga adda ti programa no sadinno ket maikkan da ti gundaway a mangurnos iti problema.
Inpalgak na nga umabot iti 92 nga empleado ti saan a nabayadan ti kontribusyon na ken kadagiti uppat nga employers ket masapol nga agbayad ti 1.72 milyon a pisos ken adda ti penalties a nasurok 500 a ribo a pisos.
Kunana a nagkari met dagiti maseknan nga employers nga isettle da ti nasao a problema ita a lawas.
Innayon ni Rillorta a basar iti payslip dagiti empleado ket naikkatan da para iti kontribusyon da ngem saan a nairemit iti ahensya.
